HUS (Heureuy Urang Sunda): Tragédi Undur-undur (1)

Rékacipta Féndy Sy. Citrawarga 

"SABARAHA-sabaraha Pérsib téh Darsép?"

"Naon téa, Jin?"

"Éta Pérsib meunang sabaraha atawa éléh sabaraha?"

"Meunang henteu, éléh henteu, Jin."

"Haaar....pan Liga 1 téh geus dimimitian tanggal 1 Oktober lin?"

"Teu, teu tulus, diundurkeun engké ka tanggal 1 Nopémber ceuk béja mah."

""Ari sugan geus der maén Darsép, horéng diundurkeun ka Nopémber nyah?"

"Nopémber gé can tangtu Jin."

"Naha, Bah?"

"Can tangtu sabab bapa-bapa pulisina keur rariweuh pisan nu matak teu méré idin ngagelar méngbal ka PSSI."

"Nuju riweuh nya Bah?"

"Enya, Jin. Nyanghareupan nu darémo, nyanghareupan pilkada, nyanghareupan korona."

"Puguh loba nu rumahuh."

"Rumahuh kumaha Darsép?"

"Enya pédah pilkada mah terus lumangsung padahal loba nu ngusulkeun sangkan ditunda heula alatan korona, tah ari méngbal mah wayahna kudu eureun heula."

"Kitu nyah Darsép? Apanan méngbal dina usum pandemi mah teu meunang dilalajoan langsung di lapangan lin, jadi ukur pamaén jeung opisial? Ari pilkada mah teu dilalajoan ogé pasti jelema ngagimbung bin pasesedek nu hartina bisa jadi nerekabna korona."

"Teuing atuh Ujin éta mah geus aturan nu dibendo."

"Kitu Bah? Paingan sok pada nyebut Liga Undur-undur atuh nya méngbal di nagri urang mah da ningan mani teu kaur lancar, kudu aya wé sésékélan terus diundur-undur deui waktuna."

"Da mémang kitu pagawéanana, Ujin."

"Pagawéan naon Bi?"

"Enya pagawéan undur-undur mah sok undur-unduran."

"Na aya kitu mahluk undur-undur da nu sok undur-unduran sakanyaho mah tukang parkir, Bi."

"Gustiiiiii....abong jelema jaman now teu nyaho undur-undur acan." 

"Na manéh nyaho nyah Darsép?"

"Bisi teu nyaho undur-undur yeuh Ujin, tah  taroskeun ka Bah Adun!"

"Si gejul, sugan téh heueuh nyaho. Naon Bah undur-undur téh?"

"Undur-undur téh sato leutik kira-kira sagedé peuteuy sélong, Jin. Hirupna ngupuk dina taneuh kolong imah, gawéna susurungkuyan, tapi mundur. Nu matak disebut undur-undur gé nya kitu pagawéanana undur-unduran."

"Oh kitu? Ayeuna aya kénéh Bah?"

"Nya meureun ari di kampung nu imahna panggung mah aya Jin. "

"Jadi undur-undur mah tara nyurungkuy ka hareup nyah?"

"Nya tara atuh Ujin. Nu sok nyurungkuy ka hareup mah....."

"Naon Bi?"

"Genep hurup Ujin. Mimitina hurup 'k' tungtungna hurup 'l'."

"Genep hurup mimitina hurup 'k' tungtungna 'l', oooh.....enya nyaho Bi lah, kohkol!"

"Seratus untuk Ujin."

"Hahaaaaa.......!" (lajengkeuneun) **

HUS (Heureuy Urang Sunda): Sugan téh (3)

Rékacipta Féndy Sy Citrawarga

"SUGAN téh geus cageur si Darsép."

"Ari pék tos damang nya Jin?"

"Angger gélo satéh Darsép!"

"Naha?"

"Pan ceuk manéh kamari. Leres Bah. Tapi diémut deui aya nu nyebat sugan téh alatan leres-leres teu ngartos kana fakta nu sanyatana, aya deui nu nyebat sugan téh ukur jijieunan."

"Jijieunan kumaha Darsép? Ceuk uing."

"Dijawab ku manéh. Mang Gihan, Jin. Apan méhméhan pepegatan jeung Bi Sulan gara-gara sugan téh jijieunan."

"Ceuk uing, alah siah, sok buru dongéngkeun Darsép!"

"Siap Jinlah, ngan isukan wé ayeuna mah uingna kudu buru-buru balik ka imah. Ceuk manéh téh."

"Uing gasik nanya. Rék nanahaon kudu buru-buru balik ka imah Darsép?"

"Ceuk manéh  rék dilongok, bisi aya nu mangku."

"Hahaaa......"

"Tah nu kitu téh ngaranna nu gélo Darsép. Saha atuh nu rék mangku imah?"

"Bisi wé Jin pan jaman ayeuna mah keur ramé nu puak-paok, panpangna nu maok HP. Enya ningan kabéjakeun kolot nu maok HP keur budakna sagkan bisa diajar onlén."

"Heueuh pan éta mah HP nu dipaokna lain imah."

"His saha nu nyaho imah gé dipaok, terus dijual ladangna dipaké meuli HP."

"Hahaaa......"

"Beuki gélo. Nya Ran sugan téh si Darsép geus cageur?"

"Lain Kang Ujin."

"Sugan téh naon atuh ceuk ilaing si Darsép Ran?"

"Ngala entéh maké gégép, pisang goréng jeung sakoteng. Sugan téh Kang Asép kasép. Manahoréng geuning ganteng."

"Hahahaaa....."

"Siiiip ...Ran, émang bener Kang Asép mah ganteng."

"Enya Kang Asép. Manteng-manteng benang kodi, ganteng-ganteng tara mandi."

"Hahaa....."

"Panuju pisan Ran. Keur nanahaon ganteng gé ari awak bau cubluk mah nya?"

"Ah siah Surjin."

"Nya heueuh siah Darsép. Mun Kang Ujin ganteng tulén nya Ran?"

"Enya Kang Ujin gé ganteng. Ngan...."

"Ngan naon Diran?"

"Sakoteng diinum kabéh. Ganteng-ganteng tara ombéh."

"Hahaaa.........!"

"Karasa Surjin?"

"Ah teuing siah Darsép."

"Kesel panginten nya Bah?"

"Naon téa Sép?"

"Sumuhun barudak sakola katut sepuhna seueur nu ngusulkeun sangkan geura-geura belajar tatap muka alias ka sarakola deui cara sasari."

"Enya kana kitu Sép teu ngabibisani tuda geus mulan-malén. Saréréa gé geus tangtu harayang hirup normal deui ngan dalah dikumaha ning koronana aya kénéh. Éta gé di sababaraha lelewek mah dihempékkeun muka sakola tapi kudu tukuh kana papagon protokol kaséhatan."

"Muhun mugia sing salabar wé nya Bah da Bibi gé tos kesel."

"Naha Bi Rahi sakola kénéh kitu atawa ngawulang panginten nya?"

"Lain kesel teu sakola atawa teu ngajar Ujin. Kesel rarandaan...."

"Hahaaa...."

"Nya atuh der wé badé nikah mah Bi."

"Nyaéta sugan téh nu keketrok rék nanyaan téh Afgan."

"Ari pék?"

"Si Apud, linmas nagih udunan ronda."

"Hahaa......" (lajengkeuneun) **

HUS (Heureuy Urang Sunda): Sugan téh (2)

Rékacipta Féndy Sy. Citrawarga

"SUGAN téh enya ngarti, Ujin."

"Naon téa Darsép?"

"Kana penjelasan ti si Abah."

"Na nyarios naon si Abah kitu?"

"Saur si Abah téh kamari jeung ka si Ujin mah si Mimin téh alus kénéh dijodokeun jeung ilaing Sép."

"Hahaaa....."

"Ngaco siah Darsép da saur si Abah kamari mah, kieu contona mah Jin. Heueuh pamaréntah atawa nu dibendo téh geus yakin barudak sakola barogaeun HP kabéh boh nu di kampung boh nu di kota. Kanyataanana pan teu kitu. Ceuk kolot murid téh, Pa teu sadayana kolot murid gaduh HP. Jawab nu dibendo, sugan téh kabéh baroga!"

"Oh.......kitu Bah, ceuk uing téh."

"Ngarti ayeuna mah Ujin? Tanya manéh."

"Ceuk uing, nya ngarti atuh Darsép."

"Ngarti kumaha? Ceuk manéh téh ningan."

"Ceuk uing, ngarti.......nyarios naon nembé téh Bah?"

"Hahaaa......."

"Enya naha atuh ari ngarti mah bet nanya deui nyarios naon nembé téh Bah?"

"Baé wé atuh Darsép, kitu-kitu waé mani jadi urusan da uing gé ngarti lah yén urang téh ulah tepi ka katipu ku kecap sugan téh."

"Contona Ujin?"

"Contona mah si Diran gé nyahoeun geura sok Ran, sisindirankeun sugan téh."

"Sugan téh kukupu muntir, sihoréng sirama-rama. Sugan téh tungkul keur dikir, horéng dahdir ka mamana."

"Hahahaaa....."

"Aya deui Ran?"

"Sugan téh duit salawé, ku barudak dikiihan. Sugan téh enya awéwé, dicabak aya sikian."

"Hahahaaa....."

"Geus ah Diran budak-budak geus beuki cubuk-cabak kana barang batur. Ari ilaing Ya boga pangalaman tina sugan téh?"

"Nya aya Kang Ajan."

"Enya sok naon waé tah?"

"Pan Yaya pacaran sama parawan anakna tatangga. Basa Yaya ngajakan asmara-asmaraan, lantas panangan Yaya ngagarayam kana awakna, Yaya sangka bakal pasrah. Nyatana mah kalah ngalawan, katanya apa-apaan nyabakan awak sayah haram jadah?!"

"Hahahaaa....."

"Nya heueuh atuh Sarya da can waktuna. Manéh mah nganggap naon waé ka awéwé téh."

"Numutkeun Abah?"

"Naon téa, Jin?"

"Sumuhun katipu ku sugan téh?"

"Enya bener kitu pisan Jin. Siga keur usum korona ayeuna loba nu katipu ku sugan téh. Sugan téh euweuh korona, buktina kasus jeung korbanna terus nambahan. Sugan téh geus zona héjo, ari pék beureum, sugan téh, sugan téh, sugan téh jeung sugan téh lianna barudak."

"Leres Bah rupina tina percaya kana sugan téh kasus korona teras nambihan teras seueur nu teu disiplin atanapi teu tumut kana protokol kaséhatan."

"Enya kitu Jin. Bener ceuk ilaing ulah tepi ka katipu ku sugan téh."

"Leres Bah. Tapi diémut deui aya nu nyebat sugan téh alatan leres-leres teu ngartos kana fakta nu sanyatana, aya deui nu nyebat sugan téh ukur jijieunan."

"Jijieunan kumaha Darsép?"

"Mang Gihan, Jin. Apan méhméhan pepegatan jeung Bi Sulan gara-gara sugan téh jijieunan."

"Alah siah, sok buru dongéngkeun Darsép!"

"Siap Jinlah, ngan isukan wé ayeuna mah uingna kudu buru-buru balik ka imah."

"Rék nanahaon kudu buru-buru balik ka imah Darsép?"

"Rék dilongok, bisi aya nu mangku."

"Hahaaa......" (lajengkeuneun) **

HUS (Heureuy Urang Sunda): Sugan téh (1)

Rékacipta Féndy Sy Citrawarga

"TOS kaping sapuluh deui nya Bah?"

"Ari kitu, Jin?"

"Muhun, bilih lepat. Mun lepat pan ngisinkeun."

"Lepat kumaha. Jin?"

"Sumuhun bilih Abah nyebatkeun ayeuna kaping hiji, sanés, ayeuna mah kaping sapuluh Agustus."

"Hahaaa...."

"Kakara gé der geus nyieun pasualan manéh mah Surjin."

"Pasualan naon Darsép?"

"Pasualan naon? Bieu ceuk manéh bisi si Abah salah nyebut tanggal. Piraku deui atuh."

"Piraku kumaha?"

"Piraku béda."

"Nya bisi wé béda. Mun béda tangtu teu sarua."

"Hahaaa...."

"Ngaco ah Surjin. Nu teu sarua mah kaayaan barudak sakola deuleu!"

"Maké teu sarua sagala Darsép? Sarua wé barudak sakola mah. Geura sok Diran sarua lebah manana barudak sakola?"

"Aya badak aya cula, si uwa naha molotot. Barudak anu sakola, sarua encan karolot."

"Hahaaa...."

"Bener Ran ngaranna gé budak can jadi aki-aki can jadi nini-nini. Ari ceuk ilaing Ya? Sarua lebah manana barudak sakola?"

"Sama-sama aya mastakaan, aya mataan, aya taktakan, aya dadaan, aya padaharanan, aya palangkakan dan sabangsana....."

"Hahaha..."

"Ngan....."

"Ngan naon Sarya?"

"Ngan kawasan palangkakan mah kagak sama antara anak bangsa adam dan anak bangsa hawa mah."

"Teu sarua  kumaha Sarya?"

"Palay apal Kang Ajan?"

"Nya enya atuh Ya."

"Bayaranana badag Kang. Maaf takkan Yaya katakan."

"Hahaaa....."

"Kana bayaran waé si Sarya mah. Minggeus ah nu kitu dibahas. Teu sarua lebah manana kaayaan barudak sakola téh  Darsép?"

"Lebah kabogana Jin. Ayeuna keur usum berita urusan HP nalika barudak sakola kudu diajar cara onlén. Ning kabéjakeun aya budak dagang goréngan, aya budak kuli ngaduk sangkan kabeuli HP. Malah nu matak pikasediheun mah aya kolot budak maok HP tatanggana sangkan anakna boga HP keur diajar onlén. Éta téh gara-gara teu sarua pangabogana, disangkana kunu dibarendo mah kaayaan kolot murid téh meureun sarua beunghar. Kitu tah, nya Bah?"

"Enya bener Sép. Mun dipikir deui mah  éta téh nyoko kana sugan téh barudak."

"Sugan téh Bah?"

"Enya sugan téh Jin. Nyaéta sikep yakin nu pasalia jeung kanyataan."

"Lieur Bah, ah."

"Tong bari gideug atuh ngabandunganana ngarah teu lieur mah Ujin."

"Ah siah Darsép."

"Kieu contona mah Jin. Heueuh pamaréntah atawa nu dibendo téh geus yakin barudak sakola barogaeun HP kabéh boh nu di kampung boh nu di kota. Kanyataanana pan teu kitu. Ceuk kolot murid téh, Pa teu sadayana kolot murid gaduh HP. Jawab nu dibendo, sugan téh kabéh baroga!"

"Oh.......kitu Bah."

"Ngarti ayeuna mah Ujin?"

"Nya ngarti atuh Darsép."

"Ngarti kumaha?"

"Ngarti.......nyarios naon nembé téh Bah?"

"Hahaaa......." (lajengkeuneun) **

HUS (Heureuy Urang Sunda): Usum Reses (4)

Rékacipta Féndy Sy. Citrawarga

"ÉTA si Sarya, hayang didenda manéh?"

"Nya kagak, Kang Ajan da taya alat pamayarna."

"Enya naha atuh, cig balik heula!"

"Kagak, ah. Da mawa."

"Heueuh sok paké atuh bisi katingalieun ku Hansip Opad ké dilaporkeun ka Pa Gupernur teu maké masker terus didenda."

"Enya Ya paké ulah ngalalaworakeun anjuran ti pamaréntah barudak. Sabab kasus korona kalah terus nambahan."

"Nambihan deui Bah?"

"Eny Bi. Geus meuntasan angka dalapan puluh rébu...."

"Gutiiii........"

"Enya Bi, ciplesna mah tepi ka poé Rebo kamari téh kasus positip korona di nagara urang aya 80.094 nu maotna 3. 797...."

"Deudeuh teuing...Abah. Dupi nu damangna deui?"

"Nu cageurna alhamdulillah aya 39,050, Bi."

"Muhun Abah alhamdulillah nya. Mudah-mudahan kanggo saterasna damang..."

"Aaamiin Bi. Nu matak kudu arati-ati sabab geuningan korona téh sakitu ngagalaksakna datangna demit alias teu katingali malah teu karasa nanaon cenah. Ningan di Bandung para calon prajurit TNI nepi ka réwuan nu katépaan...."

"Di Secapa  téa nya Bah?"

"Enya Jin. Nu matak naon sababna Kang Émil dugi ka rék ngadenda warga nu teu maké masker lamun indit-inditan, sabab ancaman korona téh demit bari jeung teu pancakaki...."

"Teu pancakaki, Bah?"

"Enya teu pancakaki, étah geuning ka markas   prajurit gé teu sieuneun....."

"Hahahaaa......."

"Tapi aya wé Bah nu neugtreug euweuh kasieun nya?"

"Saha Darsép?"

"Éta nu ngéténg bandros padahal hargana tangka Rp 20 juta, Jin."

"Ngabustam téh kabina-bina Dasép bandros nanahaon mani Rp 20 juta kitu?"

"Bandros artis, Ujin. Pan ayeuna keur ramé diberitakeun cenah pulisi nyangkalak artis ibu kota di Medan di hiji hotél jeung saurang lalaki. Cenah mah duanana barulucun....."

"Oh enya bener Sép."

"Tuh saur si Abah gé."

"Mani matak nyeri."

"Matak nyeri kumaha Bi?"

"Heueuh ari bandros artis manin payu mahal ogé dibareuli, teu cara bandros Bibi."

"Hahaaa......"

"Ari bandros Bibi kumaha kitu?"

"Baku si Ujin mah sok hayang jéntré waé. Heueuh bandros artis mah ningan étah mani dua puluh juta malah cenah nu ti heula mah tangka 80 juta, ratusan juta,  ditarebak wé. Nu matak Bibi mah mun di désa urang aya reses anggota déwan rék usul."

"Usul kumaha Bi?"

"Usul sangkan bandros Bibi payu Rp 20 juta siga bandros artis, dijamin servisnya memuaskan."

"Hahaa......" (Lajengkeuneun/seratan ieu ogé midang dina situs VISI.NEWS  kategori HEURAS, Heureuy Asép,  ti  Senén dugi ka Jumaah). **

HUS (Heureuy Urang Sunda): Zona Héjo (5)

Rékacipta Féndy Sy. Citrawarga

"MANI kabina-bina si Darsép mah ari geus ngabustam téh."

"Naon téa Jin?"

"Heueuh parabot raja dirampungkeun ku singa?"

"Hahaaa....."

"Da mémang kitu nu matak mun jelema nu sok rucah kakeunaan kasakit sipilis disebutna raja singa, tah ti dinya asal-usulna téh, malah cenah ceuk dongéng vérsi séjén mah saméméh ku jalma pinter diparabkeun ka singa téh si raja beukian téh ngeureuyeuh heula ka ucing, hayam, embé, jeung cakcak......"

"Hahahaaaa....."

"Bener cakcak, Darsép?"

"Heueuh, Jin. Cakcak badag alias buaya."

"Teu dirampungkeun ku si buaya?"

"Henteu Jin. Kalah atoh da dikeureuyeuh ku raja jeung geus heubeul rarandaan."

"Haaar...buaya sato Bu Aya awéwé Darsép?"

"Bu Aya awéwé, popotongan Pa Kusut."

"Hahaaaa.......!"

"Darsép gélo! Minggeus siah ah ka mana karep wé ngomong téh."

"Nya enggeus wé rék balik ari ulah ngomong mah."

"Gampang balik mah satéh Darsép, bayar heula hutang."

"Hutang naon ari manéh, Ujin?"

"Hutang dongéng."

"Dongéng nu mana pan bieu geus didongéngkeun Raja Singa téa, tapi ku ilaing dicempad pajar ka mana karep waé nu matak nya rék balik wé."

"Dongéng Tanteu Ratna téa, Sép."

"Tah leres Bi, pan ceuk uing téh harita, maké hadiah, Darsép? Dijawab ku manéh, enya Jin siga Tanteu Rina, méré tarucing ka barudak mun bisa neguh cenah rék dihadiahan duit 500 rébu."

"Ceuk uing deui, alah....kumaha dongéngna Darsép?"

"Ceuk manéh téh Isukan wé Jin. Ayeuna mah Tanteu Rinana keur zona beureum moal bisa diajakan, perboden."

"Hahaaa........!" 

"Ooooh...dongéng éta? Enya bener teuing naon maksudna Tanteu Rina téh ngumpulkeun barudak rék méré tatarucingan hadiahna 500 rébu. Atuh puguh barudak giak."

"Terus?"

"Ari eusi tarucingna  nu saenyana mah lain tarucing tapi teteguhan, ceuk Tanteu Rina téh sok barudak teguh warna naon cangcut Tanteu?" "Héjo, ceuk si Ojo."

"Lain! ceuk Tanteu Rina téh."

"Bodas, ceuk si Otas."

"Lain, ceuk Tanteu Rina deui."

"Konéng lah ceuk si Odéng."

"Lain, ceuk Tanteu Rina téh."

"Hideung, hideung, Tanteu hideung nya? ceuk si Toyor."

"Lain, Toyor lain hideung."

"Oh.....enya lah kelir gading geus moal salah Tanteu. Sok kadieukeun hadiahna ceuk si Iding!"

"Salah Iding, salah!" 

"Jawaban barudak euweuh nu bener, teu keuna sangkilang kabéh warna geus disebutan."

"Kumaha atuh Darsép?"

"Si Toyor  ngomong, Jin. Na ari Tanteu nganggo cangcut kelir kumaha atuh pan kabéh warna geus disebutan?"

"Nya moal aya warnaan Toyor da Tanteu mah teu dicalana, wéw, ceuk Tanteu Rina bari muka anerok keur ngabuktikeun!"

"Hahahaaa......!" (Lajengkeuneun/seratan ieu ogé midang dina situs VISI.NEWS  kategori HEURAS (Heureuy Asép)  ti  Senén dugi ka Jumaah). (réngsé) **

Carnyam Si'ar ti Padang Pasir (2): Ibrohim Ngada'wahan Ramana

Ilustrasi/net.

Kénging nyarungsum Féndy Sy. Citrawarga   

SAPARANTOS Ibrohim mendakan Gustina (Alloh SWT),  lajeng anjeunna madepkeun jiwa katut raga mung ka Alloh SWT (anu nyiptakeun alam katut sagala eusina) sareng manteng lempeng kana tetekon agama anu hak.
Sabadana, nya seja umajak jeung cumeluk ka balaréa, ka kaomna, sangkan ninggalkeun  sesembahan salian ti Alloh SWT, pangéran pupulasan. Orokaya geuningan ajakan  Ibrohim téh kalah meunang bantahan ti kaomna. Leuwihna, malik teu suka.
Nanging Ibrohim teu peunggas pangharepan,  dawahna diteraskeun, angot di antara nu ngabantah dawahna téh lain si itu si éta, tapi ramana ku anjeun nu meleg-meleg tukang nyieunan patung atawa arca. Nya kitu deui ka kaomna.
Anapon nu jadi jejer dawahna taya sanés nyatana sual taohid da puguh éta mah minangka akar kayakinan.
Nya  Ibrohim ngajak dialoh ka ramana jeung ka kaomna ngeunaan Pangéran anu sajati.
Ibrohim sasaruran ka ramana.
"Pa, naha Bapa bet nyembah arca anu teu tiasa ningali, anu teu tiasa ngadangu ogé anu teu tiasa nulungan lamun urang aya karerepet. Padahal Alloh Anu Maha Kawasa, anu nyiptakeun manusa kaasup bapa ogé apan éta téh dadamelan Gusti Alloh. Pangéran Anu Maha Ningali, Anu Maha Ngadangu, anu maparin pitulung keur sakumna hambaNa. Ku naon teu disarembah?"
Ramana  Ibrohim jeung kaomna tingharuleng. Mereunan héran duméh Ibrohim mahiwal jeung minculak, teu umum jeung kailaharan jalma réa.
Atuh kowowong wé ramana nyarita:
"Yeuh Ibrohim, ku naon mikabenci ka Pangéran-pangéran kami? Kami ngalakukeun kitu téh taya kajaba alatan luluhur kami ogé migawé nu sarupa." (hanca)
____________

SINTRÉN (Sisindiran ti Pasantrén)

"Ka sawah eujeung Kang Duloh,
tumpak béca ulah nangtung.
Nyembah mah wungkul ka Alloh,
lain arca lain patung." ***

HUS (Heureuy Urang Sunda): Zona Héjo (3)

Rékacipta Féndy Sy. Citrawarga

"SOK dilayanan nyah Bi?"

"Naon téa, Ujin?"

"Sumuhun pan saur Bibi kamari, carogé Bibi mah upami cuci mulut téh kedah  ku mulut deui. Narajang tas ngadahar jéngkol atawa peuteuy,  matak utah uger!"

"Hahahaaa....." 

"Oh éta, Jin. Nya mimitina mah dilayanan wé da ka salaki. Ngan kadieunakeun mah horéam da paméntana macem-macem."

"Macem-macem kumaha Bi?"

"Tina cuci mulut téh ménta cuci biwir, cuci gado, cuci dada, cuci beuteung, labas ka handap kana......."

"Kana naon Bi?"

"Kana....tuur."

"Hahaaa......."

"Teu wanieun nyebut euy si Bi Rahi!"

"Ngarti wé atuh Ujin da pibahayaeun...."

"Enya bener Bi. Siga bahayana korona kudu enya-enya diperhatikeun, sabab salian ti kasusna di nagara urang terus ngaronjat geus ngaleuwihan sawidak, ceuk para ahli mah cenah korona téh bisa sumebar ngaliwatan média hawa alias bisa ngapung."

"Pan saurna mung ngalangkungan ciduh, Bah?"

"Enya ceuk panalungtikan Lembaga Kasehatan Dunya atawa WHO mah nu matak keur nyegah nyaliarana cukup ku ngajaga jarak, mindeng ngumbah leungeun, jeung maké masker. Tapi ceuk para élmuwan mah bisa ngaliwatan hawa."

"Kedah kumaha atuh urang?"

"Enya kudu ati-ati wé intina mah, Jin."

"Ké saur Abah tadi angka kasus korona tos ngalangkugan sawidak, sabaraha sawidak téh?"

"Éta si Ujin mani teu nyaho sawidak-sawidak acan."

"Manéh nyaho kitu Darsép?"

"Tah si Diran gé nyahoeun. Sabaraha Ran sawidak téh?"

"Ka Cibadak meuntas cukang, pasusubuh bet tiguling. Sawidak mah iyeuh Akang, nya atuh duka téh teuing."

"Hahahaaa...."

"Si Diran mah rupa-rupa pisan. Manéh Ya? Nyaho teu sawidak?"

"Maap takkan Yaya katakan."

"Naha?"

"Sabab Yayana lapar. Jalma lapar mah jangan ada yang nanya, ajak dahar, kakara laparna bangbrat ka awang-awang. Matakna, ajakan Yaya dahar. Sanajan daharna ngan sakadar ngahanca bakakak tambah sambal dan lalab, naha lalabna atah atawa asak, Yaya takkan baha. Nyaan!"

"Hahahaaaa....."

"Teuing ah Sarya ngan kana dahareun wé silaing mah!"

"Sawidak téh Ujin genep puluh, tah ayeuna téh angka kasus korona di nagara urang geus  ngaleuwihan genep puluh rébu, ciplesna mah tepi ka poé Salasa tanggal 7 Juli kamari téh geus ngahontal angka 66.226."

"Innalillaahi......."

"Enya Bi, kadé ah ulah bongoh, ulah rasa manéh geus new normal geus zona héjo....."

"Leres Bah. Da tos moal boa angka kasus korona nérékél teras téh balukar teu disiplin."

"Tiasa janten Bi."

"Sigana mah sangkan disiplin kedah nganggo hadiah, Bah."

""Maké hadiah, Darsép?"

"Enya Jin siga Tanteu Rina, méré tarucing ka barudak mun bisa neguh cenah rék dihadiahan duit 500 rébu."

"Alah....kumaha dongéngna Darsép?"

"Isukan wé Jin. Ayeuna mah Tanteu Rinana keur zona beureum moal bisa diajakan, perboden."

"Hahaaa........!" (Lajengkeuneun/seratan ieu ogé midang dina situs VISI.NEWS  kategori HEURAS (Heureuy Asép)  ti  Senén dugi ka Jumaah).  **

HUS (Heureuy Urang Sunda): Zona Héjo (2)

Rékacipta Féndy Sy. Citrawarga

"AYA-aya wé  Sarya manéh mah."

"Naon téa, Jin?"

"Heueuh pajah téh cenah palawangan lawang  larangan bangsa adam, masa lawang larangan bangsa kadal."

"Hahahaaa......"

"Sakainget wé si Sarya mah asal nyekrup jeung ngomong sarwa a."

"Tah éta, leres Bi."

"Ari sirah, naon Sarya?"

"Nya mastaka, Kang Ajan."

"Ari buuk?"

"Yang mana pan banyak?"

"Nya buuk mah dina sirah atuh Sarya!"

"Tanaman mastaka."

"Heueuh bener. Ari halis?"

"Tanaman tarang."

"Heueuh bener, ari kumis?" 

"Tatangga baham."

"Ari godég?"

"Tanaman raray."

"Ari bulu kélék?"

"Ta mah parab Kang Ajan."

"Hahaaa......"

"Sarya gélo! Sok Bah ah ngan naon urang dina zona héjo téh?"

"Ngan tetep kudu waspada Jin. Enya najan hiji daérah geus kaasup zona héjo, terus dimeunangkeun aya kagiatan, teu ngandung harti bisa sakarep-karep cara saméméh aya korona."

"Leres, Bah."

"Enya Jin, protokol kaséhatan keur nyegah nyaliarana pirus korona kudu dilaksanakeun sakumaha mistina. Sing mindeng cuci tangan atawa ngumbah leungeun, kaluar ti imah maké masker, jeung papada jalma kudu anggang, ulah kurang ti saméter."

"Ngan kadé wé ulah siga Mang Ujuh."

"Na kumaha kitu Darsép?"

"Enya Jin, Mang Ujuh tukang dagang cingcau téa manéhna mah pengkuh kana  protokol kaséhatan, nu meuli téh teu meunang ngadeukeutan."

"Alus atuh Darsép?"

"Alus kumaha batan untung kalah buntung, Ujin."

"Haaar naha?"

"Apan gelasna pareupeus basa ngaladangan nu meuli."

"Nepi ka kitu Darsép?"

"Apan mikeun gelas cingcauna dialungkeun. Sanggap, cenah ceuk Mang Ujuh kanu meuli."

"Hahahaaa......"

"Darsép gedebul!"

"Tah ari si Jami mah padangagebugan."

"Ku saha Darsép?"

"Ari ngagebugan ku leungeun satéh Ujin, moal enya ku biwir!"

"Hahaa......!"

"Si Jami téh Jin, unggal diajakan kawin ku kabogohna nu geus dikeureuyeuh nepi ka reuneuh kalah cuci tangan."

"Auh éta mah lain cuci tangan kukumbah leungeun Darsép. Teu tanggung jawab!"

"Heueuh éta, Ujin."

"Nya pantes padangagebugan gé cuci tangan kitu mah, nya Bah?"

"Enya, Jin. Paribasa  basa Indonesia, cuci tangan téh hartina teu tanggung jawab."

"Sapertos cuci mulut nya Bah?"

"Enya Jin, cuci mulut téh kekecapan lamun urang tas dahar sangu terus ngadahar bungbuahan."

"Abdi mah boga pangalaman peurih tina cuci mulut téh Bah."

"Kumaha kitu Bi?"

"Sumuhun basa gaduh kénéh carogé unggal tas dahar téh kedah waé cuci mulut."

"Nya atuh kari nyadiakeun bungbuahan wé, Bi."

"Nya muhun pami ukur kitu mah Bibi gé sanggem. Da ieu mah..."

"Da ieu mah kumaha Bi?"

"Kedah cuci mulut ku mulut deui. Narajang tas ngadahar jéngkol atawa peuteuy,  matak utah uger!"

"Hahahaaa....." (Lajengkeuneun/seratan ieu ogé midang dina situs VISI.NEWS  kategori HEURAS (Heureuy Asép) kalayan medal  ti dinten Senén - Jumaah)  **

HUS (Heureuy Urang Sunda): Zona Héjo (1)

Rékacipta Féndy Sy. Citrawarga

"ALHAMDULILLAH nya Bah."

"Naon téa Jin?"

"Sumuhun, tos héjo."

"Naon nu geus héjo téh, Ujin?"

"Daun cau nya Jin? Nya heueuh atuh daun cau mah ti babaheula gé héjo."

"Saha nu nanyakeun daun cau, Darsép?"

"Cenah bieu ceuk manéh tos héjo. Nya naon deui nu héjo lamun di antarana lain daun cau mah."

"Ah siah pengacau Darsép. Batur can anggeus ngomong jeung si Bah Adun geus ngaréwong ngomong."

"Daripada ngaréwong duit Ujin. Atawa hayang diréwong duit, sok atuh ménta sajuta mah, mun euweuh dua juta gé teu nanaon."

"Samilyar sakalian Darsép, tong asa-asa!"

"Hahahaaa......"

"Enya naon nu héjo téh Ujin?"

"Muhun Jawa Barat, tumali sareng sumebarna sasalad corona téh saurna tos zona héjo. Langkung écésna numutkeun Abah kumaha tah?"

"Oh....éta? Enya alhamdulillah  Jawa Barat geus kaasup zona héjo alias nerekabna korona téh sakumaha kasauran Pa Gupernur, Kang Emil, geus bisa dikenyed alias dikadalikeun, najan henteu ari beresih pisan tina ancaman korona mah. Nya maksudna mah bisa disebutkeun di zona héjo téh urang-urang geus bisa beraktivitas cara sasari. Ngan......."

"Ngan naon Bah?"

"Cik ngan naon?"

"Abah onaman abdi naros kalah malik naros. Cik Ran ngan naon cenah saur si Abah?"

"Ka tonggoh rék marab domba, terus ulin jeung Pa Haji. Kabogoh mah meunang loba, ngan kawin mah cukup hiji."

"Hahahaaa..."

"Éta si Diran bet loslos kana kawin. Tapi enya alus kétang Ran nu dikawin mah hiji wé loba-loba teuing mah bisi teu kaparaban. Ari ceuk ilaing ngan naon Ya?"

"Ngan hanjakal Kang Ajan."

"Hanjakal ku naon Sarya?"

"Hanjakal Yaya ngajawab, padahal Yaya apal takkan ada alat pamayarna. Matakna sangkan Yaya ngajawab satarabasna taya gantar hahalang na baham, nya wayahna Kang Ajan mayar. Mayarna mah sabaraha sajah, ngan jangan salambar....."

"Teuing siah Sarya, ongkoh sabaraha waé ongkoh ulah salambar. Ngan kana duit wé manéh mah."

"Da pasaka ngantay-ngantay kata sarwa 'a' mah Kang Ajan. Matak jangar kana mastaka, kana raray, kana mata, kana dada, kana padaharan, kana paha, parat kana dampal panahan awak."

"Hahahaaa......"

"Aya nu diliwat Sarya. Maenya tina beuteung langsung kana pingping. Sebutkeun méh dibayar."

"Nyaan?"

"Enyaan atuh."

"Nya lah, matak jangar kana dada, kana padaharan, kana larangan." 

"Larangan mah bobogaan lalaki, Ya. Ari bobogaan awéwé?"

"Palawangan."

"Lawang naon Ya?"

"Nya lawang larangan bangsa adam, masa  lawang larangan bangsa kadal!"

"Hahahaaa....." (Lajengkeuneun/seratan ieu oge midang dina situs VISI.NEWS  kategori HEURAS kalayan medal enjing-enjing ti dinten Senen - Jumaah. Nu hoyong manten maos, mangga kantun klik we enjing-enjing di VISI.NEWS)  **

Carnyam Si'ar ti Padang Pasir (1)

Foto/net.

Kénging nyarungsum Féndy Sy. Citrawarga  

_______________

NALIKA IBROHIM MILARI PANGÉRAN

NALIKA Ibrohim seja ngayakinkeun ayana Gusti Alloh SWT kedah nyorang pirang-pirang jalan sareng kajantenan anu numuwuhkeun patalékan dina dirina. Upamina waé nalika kaayaan wanci peuting anu poék mongkléng. Anjeunna ningali béntang anu gugurilapan, teras manahna ngaraos takjub nu pamustunganana anjeunna nyangka yén éta téh pasti  Pangéran nu payus disembah nu keur dipilarina da geuning sakitu éndah jeung nyongcolangna.

Nanging, teu kantos lami ningan sang béntang nu dialem-alem téh bet ngaleungit alias tilem. Mangka sapada harita ilang kayakinan Ibrohim yén béntang téh sembaheun dirina.

"Mana atuh sembaheun kuring téh?" kitu gerencem manahna.

Dina sanés waktos anjeunna ningali bulan anu keur caang mabra. Teras anjeunna nyangka yén éta bulan téh sabagé Pangéran sembaheunana. Tapi, teu kungsi lami bulan ogé ningan ngahiang atanapi tilem. Atuh kayakinan anjeunna yén bulan nu moncorong éndah keur sembaheun téh ogé ngiring ngahiang, bolay deui baé badé mangéranan ka bulan téh.

Kapanasaran wuwuh ngaharu biru émutan Ibrohim. Nu matak teu lirén ihtiar geusan meunang kacindekan nu sanyatana. Nya saterasna nalika isuk-suk srangéngé lugay, anjeunna kagungan kayakinan yén  panonpoé anu kacida caangna batan béntang jeung bulan. Anjeunna gaduh kayakinan yén pasti nya panonpoé Pangéran sembaheun téh.

Tapi deui-deui enjeunna kuciwa lantaran geuningan nalika sareupna, panon poé nu tadi-tadi sakitu caangna téh bet ngalaman tilem kaganti ku peuting, cahya Si Raja Caang ti beurang téh teu témbong deui.

Ana kitu, sidik panon poé téh lain pipangéraneun Ibrohim da geuningan kakeunaan kénéh ku tilem. Anjeunna yakin najan enya gé jadi raja beurang, teu pantes disembah-sembah da geuningan aya tilemna.

Ku macem-macem cara anu dipidamel ku Ibrohim dina milari kayakinan ka Gusti  Alloh SWT, mangka Ibrohim bisa ngagunakeun akal pikiranana pikeun néangan bebeneran nu kapanggihna mah sabada diaping ku wahyu pituduh atanapi hidayah ti Alloh SWT. Cindekna ngadumaniskeun élmu jeung wahyu sahingga Ibrohim tinemu sareng nu diplilarina nyaéta Alloh SWT anu sayakin-yakinna, Alloh Nu Maha Tunggal, Alloh Nu Nyiptakeun alam samésta katut sagala eusina, Gusti anu moal tilem atawa ancur lebur, malah nya Anjeunna anu baris ngilangkeun jeung ngancurkeun alam samésta sareng eusina. (hanca)

_______________

SINTRÉN (Sisindiran ti Pasantrén)

"Mais lauk dina hawu,

rék dibikeun ka Kang Aan.

Adu manis élmu wahyu,

nya nguatkeun kayakinan." **